Zgjedhjet në Serbi, Vuçiç shpall fitoren, shqiptarët e Luginës së Preshevës arrijnë rezultat historik

Sikundër ishte parashikuar në sondazhe Partia Progresiste Serbe (SNS) e presidentit Aleksandar Vuçiç është fituesja e zgjedhjeve të zhvilluara një ditë më parë në Serbi, duke siguruar  mbi 60% të votave ndjekur nga Partia Socialiste dhe Aleanca Patriotike Serbe. Mes festimeve para përkrahësve ishte vetë Vuçiç ai që shpalli fitoren duke u shprehur se morën më shumë se 2.2 milionë vota.

“Ne Fituam. Fituam edhe në vendet ku nuk kishim fituar kurrë më parë. Fituam tmerrësisht bindshëm”, tha presidenti serb.

Pas gati një dhjetëvjeçari në drejtim të Serbisë, SNS në pushtet dhe udhëheqësi i saj de-fakto kanë çuar në një kontroll të fortë të pushtetit. Vetë figura e presidentit Vuçiç ka qenë qendra e sloganeve dhe e fushatës së partisë së tij, dhe ky rezultat nuk ishte aspak një surprizë për qytetarë e Serbisë.

Për vite me radhë, Serbia është përballur me kritika për nivelin e demokracisë dhe për një rënie të vazhdueshme të lirisë së mediave.

Ndërkohë sipas rezultateve paraprake, Alternativa Demokratike Shqiptare – Lugina e Bashkuar, fitoi rreth 1 për qind të votave dhe shpreson të ketë të paktën 3 vende në parlament.

Katër subjektet e Partisë për Veprim Demokratik, Alternativës për Ndryshim, Lëvizjes për Progresin Demokratik dhe Lëvizjes për Reforma e Partisë Demokratike Shqiptare garuan me një listë të unifikuar në zgjedhjet parlamentare me qellim fuqizimin e zërit të votuesve shqiptarë që jetojnë në Luginën e Preshevës.

Pas zgjedhjeve të vitit 2016, shqiptarët kishin vetëm një përfaqësues, pasi përveç Partisë për Veprim Demokratik, partitë e tjera nuk morën pjesë në garën zgjedhore për shkak të pakënaqësisë për qëndrimin e autoriteteve serbe ndaj shqiptarëve në Serbi.