“Zgjedhjet, referendum për BE-në”- Rama për mediat italiane: Pse fituam

Për kryeministrin Edi Rama, fitorja e Partisë Socialiste në zgjedhjet e përgjithshme të 11 majit ka qenë diçka e natyrshme.

Në një intervistë për të përditshmen prestigjioze italiane “La Repubblica”, Rama ka deklaruar se fitorja ka ardhur pasi në Shqipëri qytetarët e kanë të theksuar ëndrrën evropiane.

“Këtu ka dëshirë për Evropën”, ka thënë Rama, duke shtuar se, “objektivi ynë është të mbyllim negociatat e anëtarësimit brenda vitit 2027”.

“Të jemi evropianë është për ne një vijë historike finishi. Objektivi është ta çojmë në fund kantierin evropian që është hapur në Shqipëri, me synimin për t’i mbyllur negociatat e anëtarësimit brenda vitit 2027”, ka thënë Rama.

Ndërkohë, ka vijuar ai, qeveria e tij do të vazhdojë të modernizojë vendin. “Këtë do ta bëjmë duke përforcuar shtetin e së drejtës dhe ekonominë, duke mbështetur familjet dhe duke e bërë të pakthyeshëm transformimin e vendit në 360 gradë. Nëse Shqipëria vazhdon të bëjë detyrat sikurse ka bërë deri tani, atëherë do të jetë më shumë se gati për të hyrë në BE në 2030-n”, ka thënë Rama.

Gazeta italiane vë në dukje se si me fitoren e katërt, Rama është kthyer në liderin më jetëgjatë të vendit, pas diktatorit Enver Hoxha.

Në vijim të intervistës, kreu i Partisë Socialiste i ka shpërfillur pretendimet e opozitës për vjedhje votash, ndërsa ka pranuar ekzistencën e incidenteve sporadike.

“Jam mësuar me to. Në 35 vjet pluralizëm nuk e kanë pranuar as edhe një herë të vetme humbjen. Ka pasur raste të izoluara të fotografimit dhe publikimit të votës në rrjetet sociale nga shqiptarët e diasporës, që kanë votuar për herë të parë me entuziazëm”, ka thënë Rama.

Sipas tij, denoncimet e vetme që vlejnë janë ato të raportuara në prokurorinë speciale. “Denoncimet e vetme që kanë rëndësi janë ato që janë raportuar në SPAK, që duhet t’i verifikojë të gjitha. Të tjerat janë vetëm komente kafeneje pas një ndeshjeje të humbur, ku faji është gjithmonë i kundërshtarëve apo i arbitrit”, ka shtuar Rama.

I pyetur për marrëdhënien me homologen italiane Giorgia Meloni, kryeministri ka shtuar se ka marrë prej saj një mesazh vëllazëror urimi.

Ndërsa sa i takon kampeve për emigrantët ai është shprehur: “Kampet nuk qenkan në linjë me socializmin evropian? për mendimin tim nuk ka kufij ideologjikë”, ka thënë Rama.

LEXONI GJITHASHTU:

• Presidenti i Këshillit të Evropës uron Ramën: Fitore mbesëlënëse
• Tiranë: Garë e fortë për mandatin e vetëm nga lista e hapur e PD, emrat që kryesojnë