Zgjerohen investimet nga Kosova/ 50 mln € në Shqipëri, me interes ndërtimi e tregtia

Bizneset nga Kosova kanë rritur interesin për të investuar në Shqipëri. Ne vitin 2023, ato investuan mbi 50 milionë euro, kryesisht ne fushën e tregtisë dhe ndërtimit.

Tregtia dhe raportet ekonomike mes Shqipërisë dhe Kosovës janë zhvilluar ndjeshëm vitet e fundit. Kërkesat e dyanshme për investime kanë bërë që mes dy shteteve të ketë një interes të shtuar, sidomos pas vitit 2021.

Në analizën e Bankës së Shqipërisë, Kosova u rendit në vitin 2023, në vendin e katërt në listën e investitorëve të huaj në Shqipëri.

Deri në muajin shtator, fluksi i investimeve të reja ishte 50 milionë euro, duke zënë një vend të rëndësishëm pas investimeve nga Holanda, Shtetet e Bashkuara të Amerikës dhe Italia.

Stoku i investimeve nga Kosova ka arritur në 277 milionë euro, në rritje vjetore me 46%, ndërsa investimet nga fqinjët janë të përqendruara kryesisht në sektorin e tregtisë dhe ndërtimit.

Edhe shuma e përgjithshme që reflektohet në analizën e investimeve të huaja direkte në 9-mujorin e parë në Shqipëri, arrin 1.1 miliardë euro, niveli më i lartë historik i regjistruar ndonjëherë për këtë periudhë të vitit.

LEXONI GJITHASHTU: 

• Përgatitjet për duelin e shekullit në boks, Usyk “frikëson” kundërshtarin
• Nëntë ushtarë izraelitë mbetën të vrarë gjatë betejave në Gaza