Zgjidhet anëtari i ri i Gjykatës Kushtetuese, zëvëndësohet Holta Zaçaj

Gjykata e Lartë zgjedh Asim Vokshin si anëtarin më të ri të Gjykatës Kushtetuese. Asim Vokshi ka plotësuar vakancën e lënë nga Holta Zaçaj.

Gjykata e Lartë përmbylli sot procesin e votimit për zgjedhjen e anëtarit të ri Kushtetueses, nëpërmjet një Mbledhjeje të Posaçme të gjyqtarëve të saj, të zhvilluar në ambientet e kësaj gjykate.

Procesi u zhvillua në përputhje me Kushtetutën, ligjin nr. 8577/2000 “Për organizimin dhe funksionimin e Gjykatës Kushtetuese”, i ndryshuar, si dhe me Rregulloren e miratuar nga Mbledhja e Përgjithshme e Gjyqtarëve të Gjykatës së Lartë.

Pas përfundimit të votimit dhe verifikimit të fletëve të votimit nga komisioni përkatës, rezultatet ishin si më poshtë:

Asim Vokshi – 6 vota

Naureda Llagami – 8 vota

Florian Ballhysa – 0 vota

1 fletë votimi u shpall e pavlefshme

Megjithatë, asnjë nga kandidatët nuk arriti të sigurojë shumicën prej 3/5 të votave, siç përcaktohet nga ligji. Në këto kushte, sipas procedurës ligjore, si fitues shpallet kandidati i renditur i pari nga Këshilli i Emërimeve në Drejtësi.

Bazuar në këtë rregull, Asim Vokshi është shpallur anëtari i ri i Gjykatës Kushtetuese.

Vendimi do t’i komunikohet menjëherë Kryetarit të Kuvendit, Presidentit të Republikës dhe Kryetarit të Gjykatës Kushtetuese, si dhe do të publikohet zyrtarisht në Qendrën e Publikimeve Zyrtare.

LEXONI GJITHASHTU:

• SPAK nuk i ndahet Bashkisë Tropojë, merret e pandehur ish-kryebashkiakja Islamaj
• PD kërkoi mocion me debat me qeverinë, mazhoranca refuzon kërkesën