Në GJKKO është zhvilluar këtë të hënë seanca gjyqësore për çështjen e rrëmbimit dhe zhdukjes së Jan Prengës, ndërsa i pandehuri Dritan Rexhepi nuk u paraqit në sallë.

Përfaqësuesja e tij ligjore deklaroi se mungesa e klientit të saj ishte për shkak të vonesave në shoqërimin e tij nga paraburgimi i Fierit drejt paraburgimit 313 në Tiranë.

Avokatja e Rexhepit kërkoi nga gjykata që seancat e ardhshme të caktohen në ditë të tjera, me përjashtim të së hënës dhe së premtes.

Gjatë seancës, SPAK paraqiti prova shkresore me një volum prej 13 faqesh, duke përfshirë aktin e këqyrjes së vendit të ngjarjes, i cili konfirmon se viktima është shtetasi Jan Prenga. Sipas ekspertizës, njollat e gjakut të gjetura në vendin e ngjarjes janë krahasuar me ADN-në e nënës së tij, duke rezultuar të përputhshme.

Ndër të tjera, SPAK dorëzoi edhe prova filmike të marra nga disa biznese, të cilat kanë bërë të mundur ndjekjen e itinerarit të ngjarjes. Pamjet tregojnë se viktima ishte mbajtur nën vëzhgim për disa ditë përpara rrëmbimit, si dhe automjeti i dyshuar i autorëve, një Land Rover, kishte ndjekur lëvizjet e tij më 15, 16 dhe 17 janar.

Procesi gjyqësor për këtë çështje pritet të vijojë në ditët në vijim, ndërsa SPAK po prezanton prova shtesë mbi ngjarjen.

LEXONI GJITHASHTU:

• Dritan Rexhepi në GJKKO për masën e sigurisë, por dhe për zhdukjen e Jan Prengës
• Karamuço: Të hetohen lidhjet e Dritan Rexhepit me politikën shqiptare