Zjarret masive “shkatërrojnë” pushimet në ishullin Lesbos në Greqi

Zjarret masive në Europë duket se po shkatërrojnë edhe pushimet e turistëve në vëndet më atraktive të Greqisë dhe jo vetëm.

Banorët vendas në ishullin Lesbos së bashku me tursitët u evakuuan pasi  zjarri shkatërroi shtëpitë dhe zonën e plazhit të njohur si Vatera, ku është zakonisht përqendrimi më i madh i turistëve të huaj.

Vatrat masive të zjarrit u aktivizuan ditën e shtunë në mëngjes dhe nuk janë  neutralizuar ende, ndonëse  zjarrfikësit po përdorin edhe helikopter për të shuar flakët. Autoritetet janë në pritje të përforcimeve nga rajone të tjera të Greqisë.

Referuar mediave vëndase në Greqi, autoritetet lokale urdhëruan largimin e turistëve nga resorti që ishte i mbushur plot. Televizioni shtetëror ERT raportoi se të paktën dy shtëpi janë shkrumbuar totalisht.

Zjarret massive janë përhapur në pjesë të ndryshme të vëndit fqinj gjatë ditëve të fundit, për shkak edhe të temperaturave tepër të larta.

Një vatër e konsiderueshme zjarri vijon të avancojë prej tri ditësh në sipërfaqe të mëdha toke në një kodër në ishull, pranë Parkut Kombëtar Dadia, ku tymi ka penguar edhe avionët për të vepruar në zonë. Të mërkurën, zjarri që përfshiu sipërfaqe të mëdha në malet pranë Athinës shkatërroi disa shtëpi dhe detyroi qindra persona të evakuohen.

Në 2021, për shkak të zjarreve masive, u shkatërruan 121 mijë hektarë pyje në të gjithë Greqinë, gjatë asaj që u vlerësua si vala më e keqe e të nxehtit në 30 vitet e fundit.

LEXONI GJITHASHTU

• 5 vende europiane të rrezikuara nga zjarret, evakuohen mijëra banorë
• Zjarre masive në Evropë, evakuohen qindra banorë