Zjarret përfshijnë Portugalinë evakuohen banorët, Parku Kombëtar në rrezik

Zjarret kanë pushtuar Portugalinë. Më shumë se 600 zjarrfikës dhe forca të emergjencës kanë luftuar kundër vatrave të zjarrit në Cascais ditën e martë.

Vala e të nxehtit ekstrem, ka ndezur zjarre në zonën malore, në parkun kombëtar pranë kryeqytetit të Lisbonës. Ekipet e emergjencës kanë ndërhyrë me avione duke luftuar përhapjen e flakëve deri në orët e vona të mbrëmjes.

Erërat e forta si dhe thatësia e përhapur, kanë penguar shuarjen e flakëve. Qytetarë dhe banorë të zonës kanë ndihmuar ekipet zjarrfikse në terren. Autoritetet vendosën evakuimin e zonave të populluara përreth si masë paraprake.

Deri tani nëntë shtete mesdhetare janë goditur nga flakët e egra të shkaktuara nga temperaturat ekstremisht të larta dhe nga erërat e forta.

Në Kroaci, erërat e forta penguan forcat ajrore zjarrfikëse të ngriheshin. Ekipet e emergjencës luftuan me vatrat që po përhapeshin në jug të qytetit të Dubrovnikut në orët e vona të së martës.

LEXONI GJITHASHTU:

• Greqia vazhdon “luftën me zjarrin”, Rodosit ende në flakë, gjendje kritike në Kretë
• INSTAT: Rritet me 33% numri i të huajve që vizitojnë Shqipërinë