Greqia vazhdon “luftën me zjarrin”, Rodosit ende në flakë, gjendje kritike në Kretë

Zjarret masive vazhdojnë të djegin ishullin e Rodosit për të nëntën ditë rresht, teksa e tërë Greqia vazhdon të luftojë me temperaturat ekstreme dhe me flakët.

Dhjetëra mijëra persona janë larguar tashmë nga ishulli, por ende shumë turistë të tjerë po përpiqen për t’u larguar përmes fluturimeve të evakuimit.

Në disa zona, banorët janë bërë bashkë për të vënë nën kontroll flakët. Ata duan që të parandalojnë përsëritjen e skenave të ditëve të fundit, kur zjarret kërcënuan jetët dhe pronat e tyre.

Nga Evropa janë dërguar ndihma drejt Greqisë. Zjarrfikësit polakë ndodhen në Rodos duke kontrolluar zonat ku zjarret janë shuar, për t’u kujdesur që ato të mos rindizen. Në mision janë përfshirë 149 efektivë dhe 49 automjete zjarrfikëse.

Të martën një tragjedi ndodhi kur dy pilotë të forcave ajrore greke humbën jetën pasi avioni me të cilin po hidhnin ujë mbi zjarret u rrëzua në një zonë kodrinore në ishullin e Evias.

Gjatë së mërkurës, skuadrat e emergjencës janë angazhuar në një seri frontesh. Kreta, që është ishulli më i madh grek, është në gjendje alarmi, me banorët që janë paralajmëruar për një rrezik ekstrem.

LEXONI GJITHASHTU:

• Vodhi targat e 6 automjeteve të huaja, arrestohet 57-vjeçari nga Kosova
• “Çmimi i grurit do rritet”- FMN: Lufta do të ndikojë në gjithë botën