Zjarrfikësit në luftë me flakët, mbi 100 të plagosur nga zjarri në Marsejë

Më shumë se 100 persona u plagosën në një zjarr të madh që po përhapet me shpejtësi dhe kërcënon qytetin jugor francez të Marsejës, njoftuan autoritetet lokale.

Ministri i Brendshëm francez, Bruno Retailleau, tha se rreth 800 zjarrfikës ndodhen në vendngjarje dhe do të punojnë “gjithë natën” për të vënë nën kontroll flakët.

Ai shtoi se nëse era dobësohet gjatë natës siç parashikohet, kjo do të mundësojë situatën të përcaktohet më mirë në orët në vijim.

Sipas ministrit, deri në fund të mbrëmjes së së martës nuk është raportuar asnjë vdekje.

Kryebashkiaku i Marsejës, Benoît Payan, tha se shërbimet e emergjencës po zhvillonin “luftë guerile me tuba uji në dorë”. Ai theksoi se zjarri u përhap me një shpejtësi prej 1.2 km në minutë në kulmin e tij. Mediat franceze raportojnë se të paktën 400 persona janë evakuuar nga shtëpitë e tyre, përfshirë 71 banorë të një azili pleqsh në Pennes-Mirabeau.

Nëntë zjarrfikës janë plagosur gjatë operacioneve. Banorët janë paralajmëruar të qëndrojnë brenda dhe të mos evakuohen nëse nuk u është dhënë urdhër, në mënyrë që rrugët të jenë të lira për automjetet e emergjencës.

Autoritetet kanë bërë thirrje që njerëzit të mbajnë dritaret e mbyllura për të parandaluar hyrjen e tymit toksik në ambientet e tyre.

Presidenti francez Emmanuel Macron shprehu mbështetje për zjarrfikësit në rajon, ngushëllime për të plagosurit dhe bëri thirrje për kujdes dhe respektim të udhëzimeve të sigurisë.

Shërbimi lokal i zjarrfikësve bëri të ditur se 168 zjarrfikës janë angazhuar në punë, bashkë me makina zjarrfikëse dhe helikopterë. Zjarri thuhet se shpërtheu pranë qytetit Les Pennes Mirabeau.

Fluturimet për në dhe nga Marseja u pezulluan të martën, ndërsa trafiku në stacionin kryesor të qytetit u ndërpre për shkak të zjarrit. Pjesë të dy autostradave kryesore u mbyllën për trafikun.

Si masë sigurie, Spitali Nord i Marsejës kaloi në përdorim të gjeneratorëve për shkak të ndërprerjeve të vogla të energjisë.

Disa javë me valë të nxehti dhe erëra të forta kanë rritur rrezikun e zjarreve në jug të Francës, me disa shpërthime gjatë dy ditëve të fundit.

Ndryshimi i klimës ka bërë që zjarret në këtë zonë të jenë edhe më shkatërruese.

LEXONI GJITHASHTU:

• Alarmi nga shkencëtarët, sa jetë mori vala e të nxehtit në qytetet evropiane
• Ekspertët: Virusi i “sëmundjes së puthjes” lidhet me disa forma kanceri