Zjarrfikësja nuk kalonte dot për të shuar zjarrin, IMT shemb farmacinë pa leje që kishte bllokuar rrugën

Inspektorati i Mbrojtjes së Territorit shembi të premten një objekt pa leje pranë farmacisë 10, aty ku 2 ditë më parë u shkrumbua një pallat 12-katësh.

Objekti kishte bllokuar rrugën, problematikë që doli në pah ditën e zjarrit, kur zjarrfikësja nuk kalonte dot për të shuar zjarrin.

Dy ditë më parë, teksa flakët “përpinë” pallatin te farmacia 10 në Tiranë, mjetet e emergjencës me vështirësi ia dolën të futen brenda zonës për shkak të mungesës së rrugëve të përshtatshme.

Ngjarja ka nxjerrë në pah një problematikë të përsëritur në shumë ndërtime urbane, ku hapësirat e ngushta dhe mungesa e aksesit për mjetet e mëdha të emergjencës vështirësojnë reagimin në kohë ndaj zjarreve apo situatave të tjera kritike.