Zjarri pranë fushës së mbetjeve në Elbasan, Balla: Policia do t’i ruajë 24 orë

Një zjarr masiv ka përfshirë mbrëmjen e të shtunës pikën e grumbullimit të mbetjeve, e cila gjendet pranë inceneratorit të Elbasanit.

Në lidhje me këtë rast ka reaguar ministri i Brendshëm Taulant Balla i cili është shprehur se ka urdhëruar Policinë e Shtetit të rrisë sigurinë pranë landfilleve në të gjithë vendin.

Balla tha se i ka kërkuar policisë bashkiake të krijojë shërbim 24 orë kontrolli dhe zjarrfikëse që të jenë pranë për çdo lloj rasti. Policia ka dyshime që qofte zjarri në Elbasan, qoftë tentativa në Fier janë të qëllimshme.

“Kam urdheruar Policinë e Shtetit të rrisë sigurinë pranë landfieldëve – fushave të mbetjeve në të gjithë vendin. Kam kërkuar që edhe policitë bashkiake të krijojnë shërbim 24 orë kontrolli dhe shërbimet zjarrëfikëse të jenë pranë për të parandaluar çdo zjarrvënie. Policia e Shtetit ka dyshime që qoftë zjarri në Elbasan, qoftë tentativa në Fier janë të qellimshme”, është shprehur Balla.