Zyrtarët e BE-së: KE po shqyrton anëtarësimin e shpejtë, por të kufizuar për Ukrainën

Komisioni Evropian po shqyrton mënyrat për të lejuar pranimin e shpejtë të Ukrainës në BE si pjesë e një marrëveshjeje paqeje me Rusinë, por pa i dhënë Kievit të drejta të plota anëtarësimi, të cilat do të “fitoheshin” vetëm pas periudhave të tranzicionit, thanë zyrtarët e BE-së.

Ideja, e cila është në një fazë shumë të hershme, është menduar si një gjest i mundshëm për ukrainasit që kërkojnë anëtarësim në BE si pjesë e një garancie sigurie pas luftës nga Evropa dhe që pas katër vitesh luftimi kundër një pushtimi rus duan një premtim të besueshëm se janë në rrugën drejt stabilitetit ekonomik dhe integrimit me Perëndimin.

Anëtarësimi i Ukrainës në BE në vitin 2027 u përfshi në një plan paqeje prej 20 pikash të diskutuar midis Shteteve të Bashkuara, Ukrainës dhe Bashkimit Evropian, thanë diplomatët, si një masë për të siguruar prosperitetin ekonomik të Ukrainës pas përfundimit të luftës.

Por shumë qeveri të BE-së besojnë se ajo datë, ose çdo datë tjetër e caktuar, është krejtësisht jorealiste, sepse pranimi në BE është aktualisht një proces i bazuar në meritë, që ecën përpara vetëm kur ka përparim në përshtatjen e ligjeve të një vendi me standardet e BE-së.

Bashkimi me bllokun kërkon gjithashtu miratimin e parlamenteve kombëtare të 27 shteteve anëtare të BE-së.

Ideja e hedhur nga zyrtarët e BE-së do të shihte përmbysjen e procesit tradicional, megjithëse edhe anëtarësimi i kufizuar do të kërkonte ende pëlqimin e qeverive të BE-së dhe parlamenteve kombëtare.

“Duhet ta pranojmë se jemi në një realitet shumë të ndryshëm nga ai kur u hartuan për herë të parë rregullat e anëtarësimit,” tha një zyrtar i BE-së.

Ukraina, dhe potencialisht kandidatë të tjerë,  do t’i bashkoheshin BE-së shpejt dhe më pas do të kishin ‘qasje të graduar’ në të drejtën e votës, varësisht nga progresi i tyre drejt përmbushjes së kritereve të plota të anëtarësimit, tha zyrtari.