Zyrtari i DASH reagon në mediat greke për arrestimin e Fredi Belerit

Një zyrtar i Departamentit Amerikan të shtetit ka reaguar në mediat greke lidhur me arrestimin e kandidatit të koalicionit “Bashkë fitojmë” për bashkinë e Himarës, Fredi Beleri.

Ky u fundit u arrestua në orët e para të 12 majit, vetëm 2 ditë para zgjedhjeve vendore ndërkohë që këtë të shtunë pritet të jepet edhe masa e sigurisë për të në gjykatën e Vlorës.

“Ne u bëjmë thirrje autoriteteve (shqiptare) që të zbatojnë të gjitha ligjet dhe rregulloret në mënyrë të drejtë dhe të barabartë”, tha Departamenti i Shtetit në lidhje me arrestimin e kandidatit për kryebashkiak të Himarës, Fredi Beleri në Shqipëri.

Duke iu përgjigjur një pyetjeje të korrespondentëve grekë në Uashington, një përfaqësues i Departamentit të Shtetit të SHBA-së kërkoi të sigurohet vlefshmëria e zgjedhjeve , duke u bërë thirrje të gjitha palëve të respektojnë ligjet dhe rregullat.

Në veçanti, përfaqësuesi i Departamentit të Shtetit tha:

“Ne kemi kërkuar vazhdimisht nga autoritetet dhe partitë politike që të sigurojnë që votuesit të mund të ushtrojnë të drejtën e tyre themelore demokratike për të shprehur vullnetin e tyre përmes zgjedhjeve të lira dhe të ndershme.

Është e rëndësishme që të gjithë të respektojnë ligjet dhe rregullat që rregullojnë zgjedhjet, si dhe rregullat ndërkombëtare, duke përfshirë ndalimin e blerjes ose shitjes së votave . U bëjmë thirrje autoriteteve që të zbatojnë të gjitha ligjet dhe rregulloret në mënyrë të drejtë dhe të barabartë. Zyrtarët e ambasadës amerikane po i bashkohen institucioneve të tjera ndërkombëtare për të monitoruar zgjedhjet në të gjithë vendin”,-tha zyrtari i DASH.

LEXONI GJITHASHTU:

• “Fredi Beleri i barabartë para ligjit si kushdo”, MEPJ i përgjigjet Athinës
• Po transportonin 50 qese me ushqime, në pranga 3 punonjës të bashkisë Shkodër