Zyrtari rus: Pezullimi i eksporteve të armëve nga Serbia do të verifikohet në terren

Shërbimi i Inteligjencës së Jashtme i Rusisë (SVR) ka deklaruar se kompanitë private serbe të mbrojtjes vazhdojnë të eksportojnë pjesë për prodhimin e municioneve në vende të tjera, ndërsa produktet përfundimtare më pas përfundojnë në Ukrainë.

Sipas SVR-së, montimi kryesor shtesë organizohet në Bullgari dhe Republikën Çeke. Gjatë vitit 2023, në pozicionet ukrainase janë konstatuar kuti me fishekë mortajash të prodhuara në Serbi.

Presidenti serb Aleksandar Vuçiç nuk e ka fshehur shitjen e armëve dhe municioneve të prodhuara në vend për tregje të huaja, përfshirë edhe SHBA-në.

Ai ka theksuar se kjo industri është shumë e rëndësishme për ekonominë e Serbisë, duke punësuar rreth 150 persona në kompleksin ushtarak dhe industritë përkatëse.

Sidoqoftë, Vuçiç tha se nuk është në dijeni të destinacionit përfundimtar të armëve, megjithëse nuk përjashtoi mundësinë që ato të përfundojnë në duart e Forcave të Armatosura të Ukrainës.

“Për shumë shekuj, besimi i përbashkët mes popujve serb dhe rus i ka bashkuar ata në luftën kundër armiqve tanë. Është për të ardhur keq që këto tradita miqësie dhe ndihme po shkelen tani nga etja për fitim dhe multivektorizmi frikacak,” deklaroi Shërbimi i Inteligjencës së Jashtme Ruse.

Pas këtyre deklaratave, Ministria serbe e Mbrojtjes njoftoi pezullimin e eksportit të armëve dhe pajisjeve ushtarake të prodhuara në Serbi, duke theksuar se çdo dërgesë e re do të kërkojë miratimin e Këshillit të Sigurisë Kombëtare.

Presidenti Vuçiç bëri me dije se eksporti i municioneve është ndaluar plotësisht dhe tani produktet dërgohen vetëm për nevojat e brendshme të ushtrisë, ndërsa eksporti i mëtejshëm do të bëhet vetëm në raste të jashtëzakonshme dhe me vendime të posaçme.

Megjithatë, sipas kreut të SVR-së, Sergei Naryshkin, Rusia nuk beson plotësisht në këto premtime dhe deklarata, por do t’i verifikojë ato në praktikë.

Ai gjithashtu sugjeroi që presion i ngjashëm të ushtrohet ndaj Sllovakisë, e cila, megjithëse ka bllokuar sanksionet e BE-së kundër Rusisë, ka kompanitë private të mbrojtjes që me dijeninë e kryeministrit Fico po furnizojnë armë për Ukrainën.

Po ashtu, Sllovakia vazhdon të furnizojë Ukrainën me karburant dhe lubrifikantë nga nafta ruse, duke siguruar edhe tubacionin tranzit për gazin rus drejt Kievit nga vende të tjera evropiane.

LEXONI GJITHASHTU:

• Shërbimi rus i inteligjencës: Serbia po eksporton tërthorazi armë në Ukrainë
• Vuçiç: Serbia ka ndaluar eksportin e armëve