‘Mbi 1 mld euro investime’, Rama kritika kryebashkiakëve për ujësjellësat: Vlora, afro 79% humbje

Ditën e sotme, kryeministri Edi Rama i është drejtuar me kritika kryebashkiakëve për sektorin e ujësjellësit, të cilin e konsideroi një gangrenë.

Rama deklaroi se që nga viti 2014 qeveria ka bërë investime dhe janë akoduar fonde nga partneret në shumën mbi 1 miliardë euro në këtë sektor.

Rama hodhi kritika të ashpra në drejtim të kryebashkiakut të Vlorës, Dritan Leli, ku tha se në këtë kjo bashki ka regjistruar 78.9% humbje në këtë sektor, shifra më e madhe në radhët e bashkive të tjera. Leli nuk ishte i pranishëm në mbledhje.

Ndërsa për Bashkinë Kavajë, kryeministri theksoi se ka 70% humbje dhe vetëm 30% arkëtim.

“Kështu kjo histori, si mund të jenë në punë këta drejtorë ujësjellës, numri i punonjësve të ujësjellësve është sa ndonjë armatë e ndonjë shteti që është më i madh se Shqipëria”, u shpreh Rama.

Kreu i qeverisë theksoi se Ministria e Infrastrukturës duhet të ndërhyjë menjëherë për të kthyer tendencën duke ndërtuar një proces ndërveprimi me partneret dhe kryetarët e bashkive, për të riorganizuar komplet sistemin e ujësjellësit.

Rama nënvizoi se duke filluar që nga Vlora, rekurtimet për drejtuesit nuk do bëhen siç janë bërë deri më tani, por me një proces të ri.