1-vjetori i sulmit në Banjskë të Kosovës, reagon Ministria e Jashtme e Shqipërisë

Ministria për Europën dhe Punët e Jashtme të Shqipërisë ka reaguar lidhur me 1-vjetorin e sulmit terrorist të grupit të armatosur serb në Banjskë të Zveçanit në Kosovë.

Përmes një postimi në rrjetin social ‘X’, Ministria e Jashtme kujton sakrificën e efektivit të Policisë së Kosovës, Afrim Bunjaku, i cili mbeti i vdekur gjatë shkëmbimit të zjarrit.

Po ashtu Ministria shkruan se është e papranueshme që përgjegjësit e këtij sulmi të jenë ende të lirë.

Po ashtu në njoftim shkruhet se Shqipëria mirëpret vendimin e Prokurorisë së Kosovës, për të ngritur aktakuzë kundër të dyshuarve për ‘organizim dhe kryerje të këtij sulmi brutal’.

Ministria për Evropën dhe Punët e Jashtme në platformën X:

Sot mbushet një vit nga sulmi terrorist i grupit të armatosur serb në Banjskë, ku mbeti i vrarë rreshteri policor i Policisë së Kosovës, Afrim Bunjaku.

Duke kujtuar me nderim, sakrificën e Afrim Bunjakut, Shqipëria mbështet Kosovën në përpjekjet dhe arritjet e saj, për vendosjen e sundimit të ligjit në të gjithë territorin e vendit.

Është e papranueshme që autorët përgjegjës të këtij krimi mbeten ende të lirë. Drejtësia duhet të vihet në vend pa vonesa dhe justitifikime.

Shqipëria mirëpret vendimin e Prokurorisë së Kosovës, për të ngritur aktakuzë kundër të dyshuarve për organizim dhe kryerje të këtij sulmi brutal. Llogaridhënia është element kyç për parandalimin e përshkallëzimeve dhe konsolidimin e paqes në të gjithë rajonin.

LEXONI GJITHASHTU:

• BE në njëvjetorin e Banjskës: Të gjithë përgjegjësit duhet të japin llogari
• Një vit nga sulmi terrorist në Banjskë