Mbi 100 mijë kosovarë aplikuan për vizë pune në ambasadën gjermane në Prishtinë gjatë dhjetorit 2021 dhe janarit 2022.

Por, numri i atyre që duan të ikin nga Kosova mund të jetë edhe më i lartë, duke marrë parasysh që shumë qytetarë tentojnë të pajisen me një vizë edhe në ambasadat e vendeve të tjera të BE. 

Disa nga qytetarët që ka intervistuar Euronews Albania, thonë se arsyet e vetme që duan të largohen është situata ekonomike dhe shpresa për një të ardhme më të mirë. 

“Kam vendos të iki, pasi si t’i mbaj 6 fëmijë?”, tha një qytetar.

Ata thonë se nuk e kanë menduar kurrë që do të detyrohen që edhe nga Kosova e lirë dhe e pavarur do të detyroheshin të ikin 

Kjo ikje masive, sipas Naim Rashitit nga Grupi për Politika në Ballkan, vjen si pasojë e mungesës së perspektivës dhe kërkesa për një jetë më të mirë në të gjitha aspektet, jo vetëm në atë financiar. 

Ai shton se ky fenomen do te sjellë dëme të mëdha për Kosovën. 

“Vendi është i pazhvilluar dhe fuqia punëtore do të ikë. Do të krijohet një mangësi shumë e madhe që edhe me këtë ekonomi në zhvillim do të krijojë një handikap të madhe ekonomik”, u shpreh Rashiti.

Sipas Rashitit shteti duhet të veprojë sa më shpejt, që një trend i tillë i migrimit të ndalet, ndryshe dëmet do të jenë të pariparueshme. 

“Pa ndërruar paga e mjekut, e profesioneve, mbështetja për bizneset që punësojnë me mijëra njerëz, nuk do të ketë ndryshim të gjendjes”, tha Rashiti.

Rashti shton se institucionet mund të mos i vërejnë në baza ditore dëmet që po shkaktohen, por janë bizneset ato që tashmë janë të ndikuara nga ikja e fuqisë punëtore dhe e profesionistëve, çka do të ketë pasoja edhe për vetë shtetin dhe ekonominë e Kosovës në një të ardhme të afërt. 

Ai vlerëson se Kosova do të preket më së shumti nga migrimi, pasi në dallim nga vendet tjera të Ballkanit, në vendin tonë, pos situatës jo të mire ekonomike mungojnë edhe investimet e huaja, të cilat do të krijonin mundësi të reja për qytetarët kosovarë.