111-vjetori i Forcave të Armatosura, Begaj: Krenaria jonë kombëtare

Presidenti Bajram Begaj ka uruar Forcat e Armatosura të Shqipërisë në 111-vjetorin e krijimit të tyre.

Përmes një postimi në faqen e tij zyrtare në Facebook, Begaj tha se Forcat e Armatosura janë krenari kombëtare që kanë arritur me sukses të mbajnë lart flamurin dhe emrin e Shqipërisë.

Presidenti vlerësoi angazhimin e tyre në një sërë misionesh dhe operacionesh për paqen dhe sigurinë në vend, rajon dhe në botë, si dhe përmbushjen e detyrave me dinjitet, përkushtim dhe profesionalizëm.

Kreu i shtetit në cilësinë e Komandantit të Përgjithshëm të Forcave të Armatosura u shpreh gjithashtu se angazhimi i ushtarakëve ndaj Atdheut, Nderit dhe Detyrës mbetet i shenjtë dhe mbështetja e shoqërisë për Forcat e Armatosura do jetë e pakursyer.

“Në këtë ditëlindje të 111-të të tyre ne përulemi, nderojmë dhe jemi mirënjohës për shërbimin, kontributin dhe sakrificat e të gjithë efektivëve që kanë shërbyer dhe vazhdojnë të shërbejnë në Forcat e Armatosura,” – u shpreh Begaj.

LEXONI GJITHASHTU:

• Dita e Çlirimit, Begaj uron shqiptarët: Nderim përjetë atyre që na dhuruan lirinë
• “25 vite Kushtetutë”, Begaj: Kemi bërë hapa përpara në reformën në drejtësi