“Në shkollë më bullizonin se mësoja shumë dhe nuk sillesha njësoj si gjithë të tjerët”.

Ky është rrëfimi i një djali 16-vjeçar. Ai është nxënës në një prej gjimnazeve të Tiranës. Çdo ditë përballet me përbuzjen e shokëve të klasës.

“Të tjerët pinin duhan dhe unë nuk kisha qejf të merrja pjesë në këto dhe më kanë pas tallur për këtë arsye. Më kanë pas ofenduar shumë”, tregon ai.

Për t’u shoqëruar me shokët, duhet të merrte veset e tyre.

“Doja dhe unë të isha si ata”, tha ai, ndërsa tregoi se duhanin dhe alkoolin i ka nisur në fillim të vitit të dytë gjimnaz.

16-vjeçari tregon se prindërit e tij janë përpjekur ta ndihmojnë që të heqë dorë nga këto vese.

“Prindërit mendojnë se i kam rralluar por nuk më pëlqen që t’u them prindërve për sasinë. pi një paketë në ditë”, tha ai.

Ai thotë se tashmë, shokët nuk e tallin më, por ende ka probleme.

“Nuk më tallin për këtë arsye më, po akoma ka probleme. Për arsye se ata e kanë parë më parë që nuk pija dhe kur përpiqem, ata thonë që bën kot do të hiqet sikur kush jam”, rrëfen ai.