2-vjeçari në Korçë rrëzohet nga motori, pritet nisja me helikopter drejt ‘Traumës’

Një ngjarje e rëndë raportohet të ketë ndodhur në lagjen nr.4 të qytetit të Korçës.

Sipas burimeve për Euronews Albania, mësohet se një fëmijë 2 vjeçar i gjinisë mashkull ka qenë duke luajtur në oborrin e shtëpisë, kur ka hipur në motorin e parkuar dhe është rrëzuar në tokë.

Mësohet se i mituri ka marrë plagë të rënda në kokë, dhe pritet të niset drejt Tiranës. Motori ka qenë i parkuar në oborrin e shtëpisë dhe i përket babait të tij, që momentalisht ndodhet në burg.

Nëna e të miturit ka qenë brenda në shtëpi, ndërsa kanë qenë motrat e tij që e kanë parë të rrëzuar në tokë me motorin sipër trupit.

Policia po vijon zbardhjen e ngjarjes, ndërsa mësohet se i mituri është në gjendje të rëndë shëndetësore dhe do të niset me helikopter drejt spitalit të Traumës.

Njoftimi i Policisë:

Korçë/Informacion paraprak

Më datë 27.04.2024, rreth orës 15:20, në urgjencën e spitalit Korçë, është dërguar nga nëna e tij, një i mitur rreth 2 vjeç, banues në Korçë.

Nga deklarimet e para të familjarëve të tij, rezulton se fëmija duke luajtur aksidentalisht është rrëzuar në oborrin e banesës, nga motori i babait të tij, i cili ka qenë i parkuar. Për pasojë ka marrë dëmtime dhe ndodhet në kujdesin e mjekëve.

Grupi hetimor po punon për sqarimin e rrethanave të ngjarjes.

LEXONI GJITHASHTU:

• Zhdukja e 3-vjeçarit|Kikia: Gjyshërit nga Durrësi e rrëmbyen nipin, ka pësuar traumë
• Shpërthimi në Lushnjë, përfundojnë me sukses ndërhyrjet te Trauma për 2 të plagosur