2500 apartamente me qira për familjet e dëmtuara nga tërmeti në Tiranë

Kryebashkiaku i Tiranës, Erion Veliaj konfirmoi në mbledhjen e Këshillit Bashkiak se 2500 apartamente janë në dispozicion për të përmbushur nevojat për strehim me qira të 1000 familjeve të dëmtuara nga tërmeti i 26 nëntorit në kryeqytetin e vendit.

Në një nga mbledhjet e fundit të Komitetit të Rindërtimit, përfaqësues të Shoqatës së Ndërtuesve deklaruan një shifër të tillë disa ditë më parë si stok apartamentesh të pashitura në Tiranë.

“Sipas një vëzhgimi që kemi bërë sot ka rreth 2500 apartamente në Tiranë që janë le të themi të gatshme, për 1000 familje që kemi ne. Ka sot në treg mjaftueshëm për të kënaqur këtë nevojë dhe siç e thashë, me qiratë që ne kalojmë sot shkojmë në 92.2% të 1000 qirave, pra 922 nga 1000 qira që ne kemi aprovuar,” – tha z. Veliaj.

Por kryebashkiaku nuk sqaroi me detaje se për cilat apartamente bëhet fjalë, ku pretendohet të strehohet kategoria e të prekurve nga tërmeti dhe nësë ishin pikërisht apartamentet e pashitura të përmendura më lart nga Shoqata e Ndërtuesve.

Në rang vendi tërmeti i 26 nëntorit shkaktoi 1183 ndërtesa të shëmbura dhe dëmtoi rënde 5497, prej të cilave 558 pallate dhe 28 shkolla.