30 mln $ garanci sovrane, kredi e butë për grosistët e produkteve ushqimore

Grosistët e mëdhenj të produkteve ushqimore: miellit, vajit, sheqerit dhe orizit, tashmë mund të aplikojnë për të marrë kredi të butë, në mënyrë që të kryejnë furnizimet me produkte.

Qeveria ka miratuar vendimin i cili vë në dispozicion një fond prej 30 milionë dollarë që do të mbulojë me garanci deri në 60% të financimit që bizneset do të marrin nga bankat.

Shuma e kredisë që lejohet të jepet nga 4 bankat e autorizuara është sa sasia e mallrave të blerë 3 muajt e fundit të vitit të shkuar.

Qëllimi i kredisë është mbështetja e bizneseve me likuiditet në mënyrë që në tregun vendas të mos mungojnë produktet bazë.

Përmes kësaj skeme synohet të garantohet 25% e nevojave për konsum të produkteve bazë.

Interesi maksimal i kredisë do të jetë bono thesari plus një marzh 3%, çka e me normat e sotme të tregjeve të titujve shtetërore varion mes 5.3 dhe 5.5%.

Bizneset të cilat kanë detyrime tatimore të prapambetura për3 vitet e fundit apo kredi të papaguar nuk do të mundin të aplikojnë për të përdorur skemën e garancisë sovrane.

Instrumenti i garancisë sovrane u përdor masivisht nga qeveria në periudhën e pandemisë së COVID-19.

Skema e parë kishte në dispozicion një fond 110 milionë dollarë për pagesën e pagave të punonjësve, dhe nga kjo shumë u përdorën 60 milionë dollarë nga bizneset, ndërsa për kapital pune u vendos një fond 150 milionë dollarë dhe u përdorën në total 80 milionë dollarë.

LEXONI GJITHASHTU:

• A do të ketë taksë biznesi i vogël?
• 100 mln euro kredi, BERZH financon zhvillimin e turizmit dhe agrobiznesit