4 ditë reshje intensive shiu, Prefekti i Durrësit kërkon mobilizim të strukturave

Prefekti Qarkut të Durrësit përmes një njoftimi ka kërkuar mobilizim të strukturave përgjegjëse për gatishmëri maksimale në datat 6-10 shkurt.

Kjo, nisur nga informacioni i shërbimit meteorologjik që parashikon reshje intensive shiu në këtë qark.

“Nisur nga situatat e mëparshme që reshjet intensive kanë shkaktuar mbi banesat, bizneset, infrastrukturën dhe jetën e përditshme të qytetarëve, është e domosdoshme që të gjitha strukturat përgjegjëse të tregojnë gatishmëri maksimale, përgjegjësi institucionale dhe bashkëpunim të vazhdueshëm.

Në këtë kuadër, kërkohet marrja e masave parandaluese, monitorimi i vazhdueshëm i situatës në terren, raportimi i menjëhershëm për çdo problematikë që mund të lind si dhe koordinim ndërinstitucional për përballimin e çdo emergjence të mundshme.

Institucioni i Prefektit do të vijojë ndjekjen e situatës dhe do të qëndrojë në komunikim të vazhdueshëm me të gjitha strukturat përkatëse”, thuhet në njoftimin e shpërndarë.