Edhe gjatë ditës së martë Qarku i Gjirokastrës ka qenë i përfshirë nga moti i keq dhe reshjet e shiut. Megjithëse me intensitet mesatar reshjet vazhdojnë të jenë problematike për sa i përket furnizimit normal me energji elektrike të zonave malore.

Në Qarkun e Gjirokastrës rreth 400 familje vazhdojnë të ndeshin probleme si shkak i defekteve teknike në rrjet dhe stakimeve të vazhdueshme të energjisë. Stafi i OSHEE-së ndodhet në terren për riparimin e linjave të dëmtuara të energjisë.

Reshjet e shiut nuk kanë shkaktuar probleme për sa i përket përmbytjeve ndërsa niveli i lumenjve Drino dhe Vjosë është në parametrat stinorë.

Ditën e martë Policia Rrugore ka rritur praninë përgjatë rrugëve kombëtare dhe dytësore në Qark ndërsa nuk janë regjistruar aksidente rrugore me pasoja të rënda. Strukturat e emergjencave civile ndodhen në terren për të mbështetur banorët në rast të përkeqësimit të motit.

LEXONI GJITHASHTU:

• Rikthehen reshjet e borës në juglindje, zbardhet Dardha
• Reshjet e dëborës në Qarkun e Korçës, dhjetëra fshatra pa energji elektrike