Osmani: Trashëgimia e Papa Françeskut do të jetojë në jetët që ai preku

Presidentja e Republikës së Kosovës, Vjosa Osmani, ka shprehur ngushëllimet e saj për ndarjen nga jeta të Papa Françeskut, duke vlerësuar trashëgiminë e tij si të paharrueshme dhe thellësisht humane.

Në një postim në rrjetin social X, Osmani tha se populli i Kosovës i bashkohet miliona njerëzve anembanë botës në zi për ndarjen nga jeta të kreut të Kishës Katolike, duke e përshkruar atë si një zë të dhembshurisë, përulësisë dhe drejtësisë.

“Populli i Republikës së Kosovës i bashkohet miliona njerëzve anembanë botës në zi për vdekjen e Shenjtërisë së Tij, Papa Françeskut – një zë i dhembshurisë, përulësisë dhe drejtësisë në kohën tonë. Trashëgimia e tij do të jetojë në jetët e panumërta që ai preku. Ne qëndrojmë me të gjithë ata që përcjellin mesazhin e tij të qëndrueshëm të shpresës, paqes dhe dinjitetit njerëzor”, shkroi Osmani, transmeton KosovaPress.

Papa Françesku ndërroi jetë mëngjesin e së hënës, më 21 prill, në moshën 88-vjeçare. Lajmi u dha nga Vatikani përmes një deklarate nga Kardinali Kevin Farrell.

Ai shërbeu si peshkop i Romës dhe udhëheqës i Kishës Katolike që nga viti 2013, kur pasoi Benediktin XVI pas dorëheqjes së këtij të fundit. Gjatë papatit të tij, Papa Françesku njihej për qëndrimet e tij reformuese, përkushtimin ndaj të varfërve, dhe thirrjet për paqe dhe drejtësi globale.

LEXONI GJITHASHTU:

• Albin Kurti: Trashëgimia Papa Françeskut do jetojë përgjithmonë!
• Çfarë ndodh kur Papa vdes?