“8 janari ditë e zezë”, Gjekmarkaj i rikthehet përplasjes në PD

Deputeti i Partisë Demokratike, Agron Gjekmarkaj në një intervistë për emisionin “Now” në Euronews Albania, rikujtoi përplasjen mes demokratëve më datë 8 janar të këtij viti para selisë blu.

Gjekmarkaj, këtë ditë e cilësoi si të zezë e tragjike për PD. Teksa foli për situatën në këtë forcë politike, deputeti theksoi se vendimet politike janë më të rëndësishme se vendimet e gjykatës.

“Janë konsumuar shumë ngjarje në harkun e një viti, janë thënë shumë fjalë, ka pasur shumë qëndrime, 8 janari ka qenë ditë tragjike e zezë për Shqipërinë në tërësi, për PD në veçanti dhe për ne si individë, qoftë për ata që ishin në oborr, qoftë ata që ishin brenda. Mendoj se çdo vendim që është marrë nga njëra palë apo pala tjetër, rrënjët dhe bazamentin e kanë pikërisht te kjo histori e konsumuar. E përsëris që vendimet politike, janë më të rëndësishme  dhe prevalojnë mbi çdo vendim gjykate.

Por që të bësh procese politike duhet të kesh gatishmëri e vullnet politik në të dyja anët e jo nga njëra anë të kesh hile dhe nga ana tjetër rregulla. Duhet të kesh vullnet në të dyja anët që të kesh zgjidhje të pranueshme. Janë shumë gjëra bashkë që duhen marrë parasysh, kur të ndërtohet një proces politik”- theksoi ai.

LEXONI GJITHASHTU

• Gjekmarkaj thyen heshtjen: Pse zgjodha të mos flas
• Berisha: Aksioni politik i Partisë Demokratike, primaret dhe protestat