Pak minuta para se të skadonte afati ligjor, Partia Demokratike dorëzoi në KQZ kërkesën për të regjistruar koalicionin me 25 parti të tjera të titulluar PD – Aleanca për Shqipërinë Madhështore.

Partia e Lirisë, Partia Republikane, PDIU, Agrarët dhe PBDNJ janë partitë kryesore aleate të demokratëve, me të cilët do të ndahen edhe 47 vendet e sigurta të listave në 12 qarqet.

Më shumë vende PD ka dhënë për Partinë e Lirisë, e cila mësohet të ketë marrë 4 vende në listat e qarqeve, Tiranë, Fier dhe Elbasan. Sipas të gjitha gjasave, përveç Ilir Metës, në listat e sigurta të PD do të futen edhe Tedi Blushi, Erisa Xhixho dhe Edmond Haxhinasto.

Nga një vend marrin 4 partitë e tjera, të shpërndara në qarqet, Durrës, Tiranë dhe Vlorë. Në kryeqytet pritet të jenë Mediu dhe Idrizi, ndërsa Dule mund të shkojë në listën e Vlorës dhe kandidati i propozuar nga Partia Agrare, do garojë në qarkun e Durrësit.

Përtej këtyre, në koalicionin e madh të PD, nuk mungojnë edhe disa parti të tjera të vogla që nuk kanë pasur mandate deputeti prej shumë zgjedhjesh, përveç rastit kur u futën në Parlament pasi PD dhe LSI lanë mandatet në 2019-ën.

Me futjen e 8 aleatëve në lista, por edhe me 18 vendet e paracaktuara për drejtuesit politik dhe lidershipin e PD, kufizohet shumë numri i atyre demokratëve që dolën të pëlqyer në procesin e primareve që u zhvilluan më 1 mars.

LEXONI GJITHASHTU:

• Qafoku zbulon se sa deputetë do t’i marrin aleatët PD-s dhe qarqet
• PD shpall rezultatet e primareve, kush janë fituesit