Me 9 vota pro, miratohet në Komisionin e Ligjeve projektligji për amnistinë penale

Këtë të hënë është miratuar në parim me 9 vota në Komisionin e Ligjeve projektligji për amnistinë penale. Në mbledhje votoi pro deputeti i PD, Arjan Ndoja i cili ishte i vetmi nga opozita që mori pjesë. Projektligji pritet të kalojë në seancë plenare për votim më 18 qershor.

Ministri i Drejtësisë Toni Gogu gjatë fjalës së tij u shpreh se nga kjo amnisti 380 persona përfitojnë liri të plotë. Ai shtoi se 900 persona përfitojnë ulje dënimi. Sipas ministrit nga kjo amnisti nuk përfitojnë personat që janë dënuar për korrupsion, krim të organizuar dhe çështje që janë pjesë e strukturës antikorrupsion.

Ai listoi disa kategori që përfitojnë teksa tha se mes tyre janë burrat që janë dënuar deri në 3 vjet ose u ka mbetur me pak se 3 vjet. Ata lirohen menjëherë. Ministri shtoi se përfitojnë lirim të menjëhershëm edhe gratë që janë dënuar deri në 4 vjet ose ju ka mbetur me pak se 4 vjet nga dënimi.

Ndër të tjera ai theksoi se të gjithë burrat të moshës 60 vjeç e sipër dhe të gjitha gratë 50 vjeç e sipër lirohen menjëherë.