900 banorë të fshatit Balëz në Elbasan pa ujë, pusi mënyra e vetme e furnizimit

Mungesa e ujit të pijshëm është problemi kryesor me të cilën përballen 900 banorët e fshatit Balëz.

Ata tregojnë se ndërtimi i ujësjellësit është një premtim që u bëhet në çdo fushatë elektorale, por deri më tani nuk është bërë asgjë.

“Ne për ujë kemi vuajtur për çdo vit, ka pasur premtime, do sjellim ujë, asnjëherë nuk erdhi uji. Ne kemi bërë puse të gjithë si zonë.

Për ujin e pijshëm vetëm me puse, me një pus furnizohemi 4-5 shtëpi. Nuk është bërë analiza, kontrolle asgjë, thjesht nuk kemi çfarë të bëjmë”, shprehen disa banorë.

Drejtoria e Ujësjellësit të Elbasanit shpjegon për Euronews Albania se fshati Balëz nuk është pjesë e zonave në të cilat ofron shërbim kjo drejtori, për shkak se nuk ekzistojnë ujësjellësit.

“Ujësjellësi i Elbasanit do të marrë masa që të fillojë planifikimet dhe mbikëqyrjen e zonës në mënyrë që të shikojmë mundësinë e marrjes së ujit dhe furnizimin e qytetarëve me një rrjet të mirëfilltë ujësjellësi.Mendojmë se vitin tjetër në 2023-shin mund të kemi një projekt të saktë që qytetarët të mund të lidhen me një sistem të mirëfilltë ujësjellësi”, theksoi Rovena Halili, Koordinatore për rajonalizimin e Ujësjellësit Elbasan.

Fshati Balëz ndodhet vetëm 6 kilometra larg nga qyteti i Elbasanit, në një terren malor dhe me përbërje të atillë gjeologjike që nuk favorizon gjetjen e burimeve të mëdha të ujit të pijshëm.

Këto pretendohet se kanë qenë edhe arsyet më të rëndësishme që kanë lënë për dekada me radhë pa ujë të pijshëm këtë zonë.

LEXONI GJITHASHTU

• 30 vjet pa ujë e rrugë, banorët e fshatit Kështjellas në Elbasan në kushte mesjetare
• ‘E kemi ditur gjithmonë që ishte trupi i tij’, flet nëna e ‘Renit të Elbasanit’
• Zhvarroset 1 kufomë, dyshohet se i përket Renit të Elbasanit, zhdukur 8 vjet më parë