Kuvendi nuk njeh Sali Berishën si pjesë e grupit të PD

Kuvendi ka pranuar kërkesën e Partisë Demokratike për grupin e saj parlamentar ku nuk përfshihet emri i ish-kryeministrit Sali Berisha.

Më herët Berisha u vetëdeklarua si pjesë e grupit të PD, me gjithë vendimin e kreut të kësaj partie, Lulzim Basha për ta përjashtuar nga grupi.

Vendimi i kryedemokratit Basha për të përjashtuar nga grupi i PD Sali Berishën solli përçarje mes demokratëve. Një pjesë e deputetëve të zgjedhur të PD dolën hapur në mbështetje të ish-liderit të kësaj partie ndërsa një pjesë prej tyre e cilësuan të detyruar vendimin e kryetarit Basha.

Nga ana tjetër, vendimi i marrë nga kryedemokrati Lulzim Basha u përshëndet menjëherë nga ambasada e SHBA.

Në reagimin e ambasadës theksohej se vendimi i Bashës dhe se PD-ja ka guximin të shkëputet nga e kaluara për të ndërtuar të ardhmen.

Rreth 4 muaj më parë ish-kryeministri Sali Berisha u shpall person non grata nga shtetet e bashkuara të Amerikës.

Në deklaratën e DASH thuhej se “si kryeministër i Shqipërisë, Berisha u përfshi në akte korruptive, si keqpërdorimi i fondeve publike dhe ndërhyrja me proceset publike, përfshirë përdorimin e pushtetit të tij për përfitime vetjake dhe pasurimin e aleatëve të tij politik dhe të anëtarëve të familjes në shpërdorim të besimit të publikut shqiptar ndaj institucioneve qeveritare dhe zyrtarëve publikë”.

LEXONI GJITHASHTU:

• Berisha paralajmëron nisjen e takimeve për ‘një PD më të bashkuar’
• Baton Haxhiu: Berisha synon rikthimin si Nano, por do shkatërrojë vetveten