Premtimet e ripërsëritura të Ramës, nga portali i denoncimeve, tek i transparencës që s’punon prej 2017

Gjatë prezantimit të programit të ri qeverisës, kryeministri Rama premtoi aplikimin e dy nismave jo të padëgjuara. Krijimi i një faqeje për denoncime si dhe rikthimi i portalit të transparencës u riprezantuan nga kreu i qeverisë, pavarësisht se aplikimi i tyre ka nisur prej vitesh, por pa rezultatin e pritur.

“Nga sot keni në dorë përmes këtij aparati një armë për t’a luftuar konkretisht korrupsionin së bashku me ne”, ka thënë Rama në 2015-tën.

Ashtu si 6 vite më parë edhe sot gjatë prezantimit të programit të qeverisjes në mandatin e 3, kryeministri Rama për të disatën herë premtoi krijimin e një faqe denoncimi në dispozicion të qytetarëve.

“Qeveria do vendosë në dispozicion të publikut dhe medias një kanal të posaçëm informimi në faqen e saj zyrtare për çdo akuzë, denoncim apo pretendim të ngritur publikisht, që lidhet me interesin publik”, tha z. Rama sot në Parlament.

Por lançimi i kësaj nisme nuk ishte e vetmja e prezantuar nga kryeministri në programin e ri qeverisës. Kreu i qeverisë riktheu portalin transparenca.al i krijuar në 2015 për të reaguar ndaj akuzave të opozitës apo medias, i cili  prej 2017 nuk funksionon.

“Lajmet e rreme dhe denoncimet gjysmë të vërteta, që janë dhe gënjeshtrat më të mëdha, nëpër foltore, ekrane, portale, dëmin psikologjik e bëjnë njësoj, si kur janë me dashje, sikur kur janë padashje. Do hetohet me seriozitetin e duhur prej nesh dhe për çdo rast, kur ai do gjendet i bazuar, ne do reagojmë publikisht, duke bërë reflektimin e duhur”, tha sot në Kuvend kryeministri Rama.

Këto nisma janë lançuar shpesh herë nga ana e kryeministrit por pavarësisht se aplikimi i tyre ka ardhur me shumë bujë, rezultati i arritur ka qenë thuajse i papërfillshëm.