20 viktima nga COVID-19, shënohet viktima e parë në Shkodër

Në spitalin infektiv ka ndërruar jetë nga infarkti kardiak një paciente 84-vjeçare nga Tirana, e konfirmuar me COVID19. Pacientja me inicialet S.D, e shtruar prej 4 ditësh në spitalin infektiv kishte disa sëmundje bashkëshoqëruese: artrit reumatoid, fibrillation arterial dhe hipertension. Pavarësisht përpjekjeve të mjekëve të Spitalit Infektiv për ta asistuar në kohë, pacientja nuk ia ka dalë të mbijetojë.

Burime për Euronews Albania konfirmuan viktimën e parë në qytetin e Shkodrës mbrëmjen e të shtunës, kur e infektuara me inicialet R.H, 80 vjeçe, ndërroi jetë në spitalin e Shkodrës. Ajo rezultoi pozitv me COVID-19 gjate ditës së sotme.

Ministria e Shëndetësisë dhe Mbrojtjes Sociale i shpreh ngushëllimet familjes së të ndjerës dhe i kërkon qytetarëve të vijojnë të respektojnë masat e distancimit social. Është po kaq e rëndësishme që masat e kontrollit të infeksionit të respektohen maksimalisht edhe brenda rretheve familjare, duke shmangur vizitat tek të afërmit për çdo lloj arsye, për të parandaluar transmetimin e COVID-19.

Në 24 orët e fundit janë testuar 216 persona të dyshuar, prej të cilëve janë konfirmuar 29 raste të reja me COVID-19.

Deri në këto momente janë testuar 2247 raste të dyshuara dhe prej tyre janë të konfirmuar pozitivë me COVID-19, 333 raste. Mosha mesatare e rasteve pozitive me COVID-19 është 50 vjeç.

Mëngjesin e sotëm ka ndërruar jetë në spitalin Infektiv një pacient 67 vjecar nga Tirana, i konfirmuar me COVID-19. Pacienti ishte i shtruar prej 13 ditësh në spitalin infektiv, prej 6 ditësh ishte i intubuar dhe në hemodializë që e kryente brenda spitalit Infektiv.  Pavarësisht përpjekjeve të stafit mjekësor, 67 vjecari ka ndërruar jetë. Ministria e Shëndetësisë dhe Mbrojtjes Sociale i shpreh ngushëllimet familjes të të ndjerit.

Shpërndarja gjeografike e rasteve pozitive, është si vijon:

– Tiranë          157 raste

– Durrës          33 raste

– Lushnje        5 raste

– Elbasan          9 raste

– Fier                25 raste

– Kavajë          8 raste

– Rrogozhinë 4 raste

– Korçë            16 raste

– Vlorë            5 raste

– Shkodër        31 raste

– Lezhë            14 raste

– Berat            1 rast

– Has              9 raste

– Krujë            5 raste

-Tropojë        4 raste

– Pukë              4 raste

– Mirditë     3 raste