Vendimi për Berishën nuk është servilizëm i PD-së ndaj SHBA, thotë Gjekmarkaj

Deputeti i PD-së, Agron Gjekmarkaj, thotë se vendimi i kryetarit Lulzim Basha për përjashtimin e Sali Berishës nga grupi parlamentar është “certifikim i një vendimi të marrë nga SHBA”, certifikim që sipas tij nuk është servilizëm.

Në një intervistë për Euronews Albania, Gjekmarkaj e konsideroi “fazë tjetër historike” atë që po përjeton aktualisht PD në raport me ish-kryetarin e saj, Berisha. Ai tha se PD do ta kalojë këtë situatë dhe pas saj do të jetë në lartësinë e pritshmërive të qytetarëve.

Gjekmarkaj vlerësoi figurën e Berishës për faktin se është themelues i PD-së, President dhe Kryeministër. Për këtë fakt çështja ndaj tij bëhet “edhe më dramatike dhe më e dhimbshme”. Sidoqoftë ai theksoi se në raport me SHBA PD duhet të mbante pozicion “pro” saj.

“Jemi në një fazë historike tjetër, jemi përballë një vendimi që PD e ka certifikuar, por që nuk e ka marrë ajo, e ka marrë SHBA, nuk është servilizëm, nuk është ulje e shtyllës kurrizore fakti që ne bashkojmë vendimet me SHBA, pasi ata janë aleati kryesor i shtetit shqiptar,” – u shpreh Gjekmarkaj duke kujtuar ndikimin në histori të amerikanëve në çështjet e shqiptarëve.

Gjatë intervistës Gjekmarkaj foli edhe për vitin e ri shkollor, ku kritikoi qeverinë për qasjen që ka mbajtur për arsimin. Sipas tij arsimi nuk është mbështetur me investime në teknologji dhe mësuesit gjithashtu në paga më dinjitoze.

“Qeverisë nuk i intereson cilësia e arsimit, por cilësia e propagandës, sepse propaganda ia zgjat jetën në pushtet, cilësia e arsimit do t’ia shkurtonte atë,” – tha Gjekmarkaj.