Presidentja e KE në Tiranë: Shqipëria ka bërë progres, është koha që BE të bëjë të njëjtën gjë

Presidentja e Komisionit Evropian, Ursula von der Leyen ka nisur nga Tirana vizitën në vendet e rajonit.

Presidentja e Komisionit Europian u prit me ceremoni shtetërore në Pallatin e Brigadave nga kryeministri Edi Rama. Pas takimit me presidentin Meta, ajo dhe Rama do të marrin pjesë në ceremoninë e inaugurimit të shkollës dhe kopshtit “Korb Muça” në Qerekë të Krujës, një projekt i ndërtuar me fondet e BE.

Përfaqësuesja e KE do të zhvillojë dhe një konferencë të përbashkët për shtyp me kryeministrin Edi Rama.

Vizita e Ursula von der Leyen në rajon zhvillohet para takimit të BE për vendet e Ballkanit Perëndimor.

Përmes një postimi në Twitter, pas takimit me kryeministrin Rama, Von der Leyen shprehet se e ardhmja e Shqipërisë është në BE.

“Me përparimin e bërë në reformën në drejtësi, Shqipëria ka arritje të qarta. Tani BE -ja duhet të bëjë të njëjtën gjë gjithashtu”, shkruan presidentja e KE.

Delighted to start my visit to the Western Balkans in Albania.⁰
My message is clear: Albania’s future is in the EU.

The @EU_Commission stands firmly by this commitment.

With good progress on justice reforms, Albania has clearly delivered. Now the EU should do too. pic.twitter.com/VLYjz7s8oU

— Ursula von der Leyen (@vonderleyen) September 28, 2021

Pas takimit të zhvilluar në Pallatin e Brigadave, Presidentja e KE është pritur në një takim dhe nga presidenti Ilir Meta.

Rreth orës 11.30 Presidentja e Komisionit Europian, Ursula von der Leyen e shoqëruar nga kryeministri Edi Rama mbërritën në Fushë-Krujë për të hapur dyert e ambienteve të shkollës “Korb Muça” dhe kopshtit “Europa”, pjesë e programit EU4Schools financuar nga Komisioni Evropian me zbatim nga UNDP.