Nesho: Mesazhet që duhen kuptuar nga vizita e Ursula Von der Leyen në Ballkan

Turi i vizitës së Presidentes së Komisionit Evropian, Ursula Von der Leyen në Ballkan është mesazh i qartë se perspektiva e këtij rajoni është Bashkimi Evropian.

Kështu u shpreh ish-ambasadori i Shqipërisë në Organizatën e Kombeve të Bashkuara (OKB) Agim Nesho.

Sipas tij, përsëritja e mesazhit për Ballkanin dhe integrimin e tij në BE vjen pas largimit të kancelares së Gjermanisë Angela Merkel, e cila në detyrën e saj ka qenë e investuar në çështjet dhe problematikat që ka Ballkani Perëndimor.

“vizita diplomatike dhe mesazhet që donte të përcillte Presidentja e Komisionit Evropian është një mesash i perspektivës europiane të Ballkanit dhe kjo është çështja kryesore pas largimit të kacelares Angela Merkel. Ky tur i saj, tepër pozitiv dhe i rëndësishëm, ka parasysh të japë mesazhin e mbështetjes së këtyre vendeve dhe perspektivës së qartë të tyre”, tha Nesho në intervistë për Euronews Albania.

Ai hodhi kritika për kryeministrin Edi Rama duke thënë se gjuha që përdori në konferecën  e përbashkët me znj. Von der Leyen ishte me “përmbajtje agresive” ndaj Bashkimit Evropian.

“Ne pamë kryeministrin, i cili ndjehet i plotfuqishëm në përfaqësimin e Shqipërisë dhe në shumë raste u tregua skeptik, i hapur, në ato kundërshti dhe mosveprim të një Evropë të bashkuar, e cila nuk mund të zgjidhë problematikën e saj, por krijon një hendek në Ballkan”, shtoi ai.

Diplomati shqiptar thotë se vendet e Ballkanit Perëndimor kanë përgjegjësitë e tyre sa i takon vonesave për t’u përafruar me Bashkimin Evropian.

“Vetë presidentja ishte e qartë, nuk ka vonesa, por kishte kulturën dhe diplomacinë e shprehjes së mesazhit. Ajo nuk erdhi me shkop, por BE vepron mbi bazën e vlerave dhe principeve mbi të cilat është krijuar. Ky proces i integrimit vjen nga vullneti i popujve të Evropës Juglindore, nuk është një kërkesë që Evropa e shpreh”, theskoi ai, duke shtuar se BE-ja vijon të mbështesë fuqimisht Procesin e Berlinit, proces ky,  i cili synon nxitjen e bashkëpunimit gjithëpërfshirës të gjashtë vendeve të Ballkanit Perëndimor.

LEXONI GJITHASHTU: 

• Procesi i Berlinit apo Ballkani i Hapur? Von der Leyen dhe Rama përgjigjen për Euronews Albania