Shkon në 23 numri i viktimave nga COVID-19, ndërron jetë një 72-vjeçare

Një paciente 72-vjeçare nga Tirana, e konfirmuar me COVID19, ka ndërruar jetë pasditen e së enjtes në Spitalin Infektiv në QSUT. E moshuara ishte në gjendje të rëndë shëndetësore dhe ndodhej në terapi intensive prej disa ditësh.

Gjendja e saj është rënduar së tepërmi gjatë ditës së enjte, kur edhe është intubuar. Por, pavarësisht trajtimit mjekësor dhe përpjekjeve të mjekëve, nuk ka arritur të mbijetojë.

Mjekët e Spitalit Infektiv bëjnë të ditur se, 72-vjeçarja vuante nga disa sëmundje bashkëshoqëruese, si insuficenca renale kronike, hipertensioni dhe hipotiroidizëm. E moshuara është viktima e 23 me COVID19 në Shqipëri.

Ministria e Shëndetësisë ka bërë sot të ditur se bashkë me rastet e reja numri i personave të infektuar nga COVID-19 ka shkuar në 409 persona. Gjatë 24 orëve të fundit janë kryer 234 teste, prej të cilave 9 kanë rezultuar pozitivë.

Nga ana tjetër, gjatë 24 orëve janë shëruar 11 qytetarë, ndërsa numri i atyre që kanë lënë spitalin ka shkuar në 165. Në dy spitalet COVID aktualisht po marrin shërbim 58 pacientë, ndërkohë harta e të prekurve është zgjeruar në Tiranë me 6 raste dhe tre raste të tjera në Elbasan.

Lexoni gjithashtu:

Ministria e Shëndetësisë: 9 raste të reja në 24 orët e fundit, 165 të shëruar