Forumi mbi Përkujtimin e Holokaustit, Rama: Ishim vendi me më shumë hebrenj pas Luftës së Dytë Botërore

Në fjalën e mbajtur në Forumin Ndërkombëtar mbi Përkujtimin e Holokaustit në Malmo, Kryeministri Edi Rama u shpreh se Shqipëria ishte i vetmi vend në Europë me më shumë hebrenj pas Luftës së Dytë Botërore se sa para saj.

“Dyshoj nëse të gjithë në këtë sallë e njohin historinë e shpëtimit të hebrenjve në Shqipëri, ndaj do më duhet të përsëris atë çka thashë në një prej seancave; Shqipëria është vendi i vetëm në Europë me më shumë hebrenj pas Luftës së Dytë Botërore se sa përpara saj dhe është vendi që u kthye në një strehë të sigurt për hebrenjtë, të cilët erdhën pikërisht për të gjetur strehë e për të shpëtuar në atë kohë kur në kontinentin tonë, të ishe hebre, ishte praktikisht një dënim me vdekje”, u shpreh kryeministri Rama.

Rama nënvizoi se historia po përsëritet sërish me Shqipërinë që mirëpriti së fundmi rreth 4 mijë emigrantë afganë.

“Ne qemë vendi i parë që u hapi dyert afganëve dhe pranoi të strehonte 4000 afganë, e meqë ra fjala, kundërshtia në vendin tonë ishte e papërfillshme, pasi shqiptarëve u vjen natyrshëm t’i gjenden atij që është në nevojë, ashtu siç ishim ne tridhjetë vjet më parë, kur iknim nga regjimi brutal dhe gjetëm dyer që na u hapën kur kishim nevojë”, tha kreu i qeverisë shqiptare.