Rekord infeksionesh në një ditë, 79 raste të reja në Kosovë, totali i infeksioneve shkon në 362

Shtatëdhjetë e nëntë raste të reja të infektuara me COVID-19 janë konfirmuar në orët e vona të së dielës, në Kosovë, numri më i madh i të infektuarve në një ditë, që kur u shfaq pandemia. Rastet e reja të konfirmuara nga Instituti Kombëtar i Shëndetit Publik, e çojnë në 362 numrin e përgjithshëm të infeksioneve me këtë sëmundje. 

Nga 79 pacientët e diagnostikuar të dielën, gati gjysma e tyre, 35, janë nga komuna e Ferizajt, 16 nga komuna e Prizrenit, nga 6 raste të reja në komunat Hani i Elezit dhe Vitia, 3 nga Gjilani, nga 2 në Malishevë e Vushtrri, si dhe nga 1 në komunat Skenderaj, Klinë, Rahovec, Fushë Kosovë, Istog, Mitrovicë e Veriut, Leposaviq, Zubin Potok dhe Kamenicë.

Ndërkohë, numri i përgjithshëm i të shëruarve ka shkuar në 59 pasi të dielën është konfirmuar shërimi i një pacienti. Ndërsa nga virusi kanë humbur jetën 7 persona. Deri tani, janë testuar 3256 mostra të dyshimta për COVID-19, ndërsa numri i përgjithshëm i personave të kontaktit me të infektuarit, që po mbahen nën mbikëqyrje nga IKSHP-ja është 4795.