Ndryshimet kushtetuese, Balla: Jemi 100% të hapur për të diskutuar mbi propozimet e PD-së

Kreu i Grupit Parlamentar të Partisë Socialiste, Taulant Balla deklaroi se socialistët janë të hapur për të diskutuar mbi të gjitha propozimet që vijnë nga selia blu për ndryshimet kushtetuese.

“Jemi 100% të hapur për të diskutuar të gjithë propozimet që vijnë nga Grupi Parlamentar i PD-së. Në këtë fazë të procesit ajo që vlen është se propozimet përmbushin kushtet që ka vendosur Kushtetuta dhe rregullorja e Kuvendit”, u shpreh Balla.

Deputeti nënvizoi se çështja e zgjatjes së afatit të KPK-së nuk mund të bëhet pjesë e debatit politik.

“Çështja e ndryshimeve kushtetuese për zgjatjen e mandatit të KPK-së dhe komisionarëve të Vettingut është një çështje që nuk është çështje e jona, është një çështje shumë teknike për të zgjatur mandatin e këtyre dy institucioneve për të garantuar një proces të njëjtë për të gjithë gjyqtarët dhe prokurorët që kalojnë në procesin Vettingut. Si i tillë natyrshëm e kam thënë që dua ta ruaj këtë nivel teknik dhe të mos bëhet pjesë e debatit politik”, u shpreh Balla.

Ai shtoi se “është hap i rëndësishëm fakti që në Kuvend kemi një opozitë që ushtron mandatin duke ardhur me propozime konkrete”.

LEXONI GJITHASHTU:

• Zbardhen ndryshimet kushtetuese që propozon PD: Vetting i politikanëve, Reformë Zgjedhore dhe Territoriale