Vettingu i politikanëve, Basha: Fillimisht në sitën e SPAK, kryeministri, deputetët dhe kryetarët e bashkive

Kryetari i PD-së, Lulzim Basha deklaroi se institucioni  i SPAK-ut duhet të kryejë Vettingun e politikanëve, në mënyrë që të bëhet shkëputje e krimit të organizuar nga politika.

Gjatë një konference për mediat Basha theksoi se SPAK duhet të marrë si fillim më shumë se 200 politikanë të lartë, deputetë, kryetarët e bashkive, kryeministrin, kreun e kuvendit dhe t’i fusë në sitën e kontrollit të imtësimesh, sa i përket lidhjeve të mundshme me krimin e organizuar.

Ai sqaroi se hetimet për politikanët duhet të bëhen edhe sa i përket pasurive të tyre, familjarëve të tyre, të personave të tjerë që mund të mos jetë familjarë, por administrojnë pasuri të paligjshme të njerëzve të politikës.

“Shqipëria e ka të domosdoshme që të ndërmarrë një hap për të pastruar politikën nga influenca e krimit të organizuar që shkon deri në praninë e njerëzve të krimit të organizuar në politikë”, theksoi Basha.

Kreu i demokratëve tha më tej se Vettingu i politikanëve nuk është vetëm interes i Partisë Demokratike, por është interes kombëtar.

“Jam i bindur që nuk ka socialistë të ndershëm, çfarëdo të mendojë për mua apo PD-në, që mos të më japë të drejtë kur numëron kacidhet në fund të muajit dhe sheh “bosët politikë” të zhytur në luks në Shqipëri dhe në restorantet më të shtrenjta të botës. Për të mos folur për demokratët, në raport me këtë qeveri, por edhe në raport me llumin e qeverisë tonë se dhe ne kemi pasur llumin tonë”, tha ai.

LEXONI GJITHASHTU:

• Vettingu i politikanëve, këshilltari ligjor në PD: Të krijohet një sektor i posaçëm pranë SPAK
• Ndryshimet kushtetuese, Balla: Jemi 100% të hapur për të diskutuar mbi propozimet e PD-së