Mazhoranca nuk paraqitet në komisionin hetimor, Gogu: Kryetari shkeli rregulloren në mënyrë flagrante

Mbledhja e dytë e Komisionit Hetimor për zgjedhjet nuk u zhvillu ditën e sotme, për shkak se anëtarët e Partisë Socialiste nuk ishin prezentë.

Kryetari i këtij komisioni, Enkelejd Alibeaj thotë se mazhoranca nuk u paraqit për të ndaluar hetimin për zgjedhjet e 25 prillit, ndërsa nënkryetari i komisionit, Toni Gogu tha se data e përcaktuar për mbledhjen nuk është votuar në komision, siç duhet të ndodhë sipas Kushtetutës.

Në një lidhje të drejtpërdrejtë me Euronews Albania, Toni Gogu u shpreh se mbledhja e kaluar e komisionit u ndalua në mënyrë “të çuditshme” nga kryetari, pa zbatuar pikat e rendit të ditës, një ndër të cilat ishte edhe caktimi i datës për mbledhjen e radhës.

“Ata janë larguar pa miratuar pikën e shtatë të rendit të ditës që është përcaktimi i mbledhjes së ardhshme”, tha Toni Gogu.

Ai u shpreh se i ka propozuar që më përpara z. Alibeaj që mbledhja të zhvillohet të enjten, për shkak se deputetët nuk mund të ishin të pranishëm të mërkurën.

Mirëpo kjo kërkesë nuk u mor parasysh, thotë z. Gogu.