Psikiatrja: Prindërit ‘i fshehin’ fëmijët autikë nga frika e paragjykimeve, ndërhyrja e hershme jep rezultat

Psikiatrja Elona Dashi tha për Euronews Albania se ‘standardi i artë’ për të ndihmuar fëmijët me spektrin e autizmit është ndërhyrja e hershme.

Sipas saj, nëse kjo ndërhyrje nis rreth moshës 24-36 muajsh rezultatet do të jenë më të mirë dhe sa më vonë të nisë kjo ndërhyrje shanset për të marrë rezultate zvogëlohen.

Psikiatrja tha se në Shqipëri ende prindërit e fshehin nga komuniteti diagnozën e fëmijës së tyre, të ndikuar nga stigma, por shtoi se vitet e fundit diçka ka nisur të lëvizë në këtë drejtim.

“Ka një lëvizje pozitivisht vitet e fundit, sepse po bëhet një luftë mediatike për këtë problem, por shumica e herëve ndodh që kontakti i parë me psikiatrin për këta fëmijë të jetë relativisht vonë.

Ajo u shpreh se çiftet me fëmijë autikë duhet të marrin ndihmë psikologjike edhe për veten e tyre, pasi marrja e një diagnoze ka një ngarkesë të madhe emocionale, sjell konflikte në çift e ndonjëherë deri në divorc.