BDI e kriminalizuar, duhet larguar nga çdo pushtet, thotë kryebashkiaku i Gostivarit

Bashkimi Demokratik për Integrim është i kriminalizuar dhe duhet larguar nga çdo pushtet, sipas Sekretarit të Përgjithshëm të Partisë Aleanca për Shqiptarët.

Arben Taravari, njëherazi dhe kryetar i bashkisë së Gostivarit deklaroi për “Balkan Talks” në Euronews Albania se të gjitha institucionet në Maqedoninë e Veriut janë BDI-zuar.

“Nuk kam asnjë mllef ndaj Bashkimit Demokratik për Integrim. Është në pushtet më shumë se 20 vjet. Imagjinoni 20 vjet edhe të ishte fantastike çdo gjë, mendoj se është shumë,” – u  shpreh Taravari.

Sipas tij stacionet policore në RMV janë kthyer në shtabe partiake dhe BDI bashkë me gjithë institucionet që ka në qeveri ushtron presione të jashtëzakonshme dhe shitblerje të vazhdueshme të votave. Në këto kushte nuk mund të themi se BDI ka fituar zgjedhjet, në këndvështrimin e Taravarit.

Kryebashkiaku i Gostivarit u shpreh se raundi i balotazhit do të jetë i lehtë dhe s’do të ketë nevojë për konsultime me spektrin e gjerë politik.