Kriza politike në Rumani, Ciuca heq dorë nga detyra për të formuar një qeveri të re

Nicolae Ciuca, i cili pritej të merrte detyrën e kryeministrit të Rumanisë, ka hequr dorë zyrtarisht nga mandati për të formuar një qeveri të re.

Ciuca nga Partia Kombëtare Liberale ishte caktuar nga presidenti të formonte kabinetin qeverisës, por ishte bërë e qartë se ai duhej të siguronte mbështetje të mjaftueshme parlamentare.

“Shpresova se me hapat që kam bërë të kisha sukses në gjetjen e një zgjidhjeje politike, që një qeveri e pakicës të kalojë në parlament. Por ne pamë vendimin e dy partive politike që njoftuan se nuk do ta votojnë këtë qeveri”, tha Nicolae Ciuca, i nominuar për kryeministër

Tërheqja e Ciuca-s zgjat krizën politike disamujore të Rumanisë, ndërsa vendi përballet me një rritje të rasteve dhe vdekjeve me COVID, çka po rëndon dhe po shton presion mbi sistemin shëndetësor.

Kriza politike filloi në shtator, kur ish-qeveria liberale e kryeministrit Florin Citu u rrëzua me një votë mosbesimi.