Kim takim me Ballën dhe Rushajn: Palët të trajtojnë njëra-tjetrën me respekt

Ditën e sotme ambasadorja amerikane në Tiranë, Yuri Kim ka kryer një takim me kreun e Grupit Parlamentar të PS-së, Taulant Balla dhe kreun e Grupit Parlamentar të PD-së, Alfred Rushaj.

Për këtë takim, ambasadorja Yuri Kim është shprehur në një postim në Twitter se është e rëndësishme që palët të trajtojnë njëra-tjetrën me respekt.

“Faleminderit kryetarëve të grupeve parlamentare Taulant Balla dhe Alfred Rushaj për takimin e sotëm për të ndarë pikëpamjet mbi prioritetet e tyre përkatëse legjislative. Është e rëndësishme që palët të trajtojnë njëra-tjetrën me respekt të ndërsjellë, të diskutojnë dallimet me ndershmëri, të ngrihen mbi partishmërinë kur është e mundur”, shkruan ambasadorja në një postim në Twitter.

Ky takim vjen pak orë para mbledhjes së përbashkët të Këshillit të Legjislacionit me Komisionin e Ligjeve, ku do të diskutohen ndryshimet kushtetuese për vettingun e politikanëve, reformën zgjedhore dhe territoriale.