Ndryshimi i Kushtetutës, mazhoranca dhe opozita përçahen për procedurën

Mazhoranca dhe opozita nuk kanë arritur të gjejnë kompromis për procedurat që duhet të ndiqen për ndryshimin e Kushtetutës për reformën zgjedhore, territoriale, vetingun e politikanëve dhe zgjatjen e procesit të vetingut.

Gjatë diskutimeve në Këshillin për Legjislacionin, Partia Socialiste kërkoi që dy çështjet të shqyrtohen veçmas, kurse Partia Demokratike tha se kjo duhet bërë njëkohësisht.

Alfred Rushaj i PD gjatë prezantimit të nismës për ndryshimin e Kushtetutës tha se propozimet e opozitës për vetingun e politikanëve janë në përputhje me Gjykatën Evropian për të Drejtat e Njeriut dhe Komisionit të Venecias.

Rushaj specifikoi se vettingu i politikanëve është parashikuar të kryhet nga SPAK dhe të kalojë në dy filtra shtesë: Gjykata e Posaçme Kundër Korrupsionit dhe Krimit të Organizuar si dhe Gjykata Kushtetuese.

PD përveç ndërhyrjes në Kushtetutë për ndarjen territoriale të vendit, ka kërkuar gjithashtu dhe ndryshimin e Kodit Zgjedhor.

Për shkak të mos arritjes së një konsensusi për procedurën e punës, përfaqësuesit e PD në Këshillin e Legjislacionit braktisën mbledhjen.