Vladimir Putin, mesazh rusëve për Pashkët ortodokse: Situata është nën kontroll, jemi të fuqishëm

Në mesazhin e Pashkëve të së dielës, drejtuar popullit të tij, presidenti rus, Vladimir Putin deklaroi se situata e coronavirusit në vend është nën kontroll.

“Të dashur miq, nga thellësia e zemrës ju uroj gëzuar Pashkët ortodokse, një ditë e shenjtë për të gjithë besimtarët. Jam i vetëdijshëm që të gjithë besimtarët rusë do të më bashkohen në këtë festë, që kremtohet ndryshe nga vitet e tjera. Të gjitha strukturat qeveritare po punojnë sistematikisht dhe në mënyrë të përgjegjshme. Situata është nën kontroll. E gjithë shoqëria po mobilizohet përballë një kërcënimi të tillë. Edhe një herë dëshiroj të falënderoj ata që po i japim një dorë më nevojtarëve”, tha presidenti Putin.

Lideri rus tha se ekonomia e vendit, shkencëtarët dhe sistemi shëndetësor janë në lartësinë e duhur për t’i bërë ballë çdo situate. Autoritetet ruse, së bashku me klerikët ortodoksë, i kanë bërë thirrje njerëzve të qëndrojnë në shtëpi gjatë fundjavës së Pashkëve.

“Këtë vit festimet po zhvillohen nën masat e detyrueshme kufizuese. Ato janë të nevojshme në luftën ndaj coronavirusit. Duke u bashkuar po i japim zgjidhje problemeve që na janë vënë përpara. Për të arrtitur këtë gje, siç e kam thënë edhe më përpara, vendi ynë i ka të gjitha mjetet e nevojshme: një ekonomi të fortë, mjetet shkencore dhe materialet e nevojshme në sistemin shëndetësor”, tha ai.

“Po analizojmë me kujdes përvojën e vendeve të tjera. Në bashkëpunim të vazhdueshëm me miqtë dhe kolegët tanë, ne kuptojmë se ç’po ndodh, i shohim rreziqet dhe dimë çfarë të bëjmë, pavarësisht se si do shkojë situata dhe po ndërmarrim çdo hap të nevojshëm”,  shtoi presidenti rus.

Rusia raportoi një rritje prej 6 mijë personash të infektuar në 24 orët e fundit, duke e çuar numrin total të të infektuarve në 48 mijë persona. Numri i të prekurve me COVID-19 u rrit ndjeshëm gjatë muajit të fundit, edhe pse në fillim të pandemisë Rusia kishte raportuar një numër të ulët rastesh me COVID-19, krahasuar me shtetet e tjerë në Perëndim. Të shtunën numri i viktimave në Rusi shkoi në 313 nga 40 që ishte një ai i një ditë më parë.