Hapet ekspozita në kujtim të 1623 personave të zhdukur gjatë luftës në Kosovë

Në muret e një korridori të gjatë e të ngushtë janë vendosur emrat, mbiemrat dhe vendi i zhdukjes së mbi 1600 personave. Në fund të këtij korridori është një dhomë tjetër e errët dhe e madhe, ku numërohen ditët, orët, e minutat prej ditës kur familjarët po presin për ta.

“Më i mirë ish varri, sesa mos me ditë” është një fragment marrë nga biseda me Kumrije Jahmurataj, një nga familjarët e shumtë që sot presin më të dashurit e tyre. Brenda saj janë edhe disa gurë të cilët janë dëshmitarë të kohës.

Pasditen e sotme shumë qytetarë, organizata, ambasadorë e familjarë, kanë marrë pjesë në hapjen e ekspozitës nga Fondi për të Drejtën Humanitare, në kujtim të 1623 personave të zhdukur gjatë luftës së fundit në Kosovë.

Ekspozita po mbahet në sallën e Atelesë te Pallati i Rinisë dhe Sporteve, në Prishtinë.

Kjo vjen në kohën e denoncimeve dhe zbulimeve të reja të varrezave masive te shumta të dyshuara në territorin e Serbisë.

Kjo ekspozitë është realizuar nga artisti Driton Selmani dhe është kuruar nga Blerta Hoçia. Realizimi është bërë në bashkëpunim me Kosovo 2.0 dhe është mbështetur nga Zyra e Bashkimit Evropian në Kosovë, Komunës së Prishtinës dhe Ambasadës Zvicerane në Kosovë.