COVID tkurr shpenzimet, familjet evropiane harxhojnë më pak për festat e fundvitit

Një ndjesi qetësie dhe kujdesi ka përfshirë tregun e Krishtlindjes në qytetin e Frankfurtit, pavarësisht se ai është i hapur për të gjithë.

Për të shijuar një filxhan verë të zier, një rit i këndshëm i dimrit në kohët para pandemisë, klientët e maskuar duhet të kalojnë përmes një hyrjeje njëkahëshe në një kasolle të rrethuar, duke ndaluar në stacionin e dezinfektimit. Megjithatë, jo të gjithë e kanë problem.

“Ne jemi të lumtur që jemi këtu këtë vit dhe i jemi mirënjohës qytetit të Frankfurtit që na lejon të qëndrojmë këtu. Nuk e kemi problem t’u përmbahemi rregullave, si vendosja e maskës, të cilën duhet ta mbajmë edhe kur largohemi”, thotë Anuschka Haman, shitëse.

Shumica e eventeve të periudhës së festave në Gjermani dhe Austri janë anuluar. Me mbylljen e tregjeve largohen edhe paratë që turistët mund të shpenzojnë atje, por edhe në restorante, hotele, apo qendra tregtare.

“Ndërsa parashikimet në terma afatshkurtër për ekonominë janë të errëta, sidomos sa i takon konsumit privat, është më e qartë se më vonë, ndoshta në shkurt, njerëzit do të jenë tërësisht të mbrojtur, në gjendje të shijojnë normalisht jetën dhe të shpenzojnë si më parë”, shprehet Holger Schmieding, ekonomist i bankës Berenberg, Londër.

Sipas ekspertëve, kursimet e krijuara gjatë pandemisë do të mbeten në llogaritë bankare të familjeve derisa perspektiva ekonomike të jetë më optimiste.