Takimi i mundshëm me Vuçiç në javën e dytë të dhjetorit, thotë kryeministri Kurti

Kryeministri Albin Kurti thotë se mund të ketë një takim me presidentin e Serbisë, Aleksandër Vuçiç në javën e dytë të muajit dhjetor. Sipas tij, temat për të cilat do të diskutohet në këtë takim nuk kushtëzohen nga Serbia.

Deklarata e Kurtit u bë gjatë prezantimit të masave të reja kundër pandemisë me ministrin e Shëndetësisë, Rifat Latifi.

“Është diskutuar mundësia e një takimi të mundshëm në javën e dytë të dhjetorit në Bruksel me presidentin e Serbisë. Nuk kam kurrfarë informacioni që ka kushtëzime nga ndokush veçse vlerësimi se a duhet të mbahet një takim i tillë ose jo i përket ndërmjetësuesit, lehtësuesit siç e quajnë ata veten, përkatësisht zëvendëspresidentit të Komisionit Evropian, Jozef Borrel dhe emisarit të tij Lajçak. Janë ata të cilët e vlerësojnë nëse na dërgojnë ftesat ose jo dhe jo çfarëdo kushtëzimi i palës tjetër“, tha ai.